Isang dating security guard ang ngayon ay opisyal nang nagtatrabaho sa loob ng bangko bilang teller, matapos tahakin ang mahabang landas ng sakripisyo at determinasyon. Siya si Ricardo “Jun” Laingo Jr., 35-anyos, tubong Miputak, Dipolog City, Zamboanga del Norte.
Bilang bunsong anak sa limang magkakapatid, simple lamang ang buhay ni Jun. Mangingisda ang kanyang ama at nagtitinda ng isda ang kanyang ina. Noong 2010, nagsimula siyang magtrabaho bilang agency-hired security guard, at sa loob ng walong taon ay naging bantay siya sa Security Bank Dipolog Branch. Sa kabila ng tagal sa serbisyo, hindi siya empleyado ng bangko—isa lamang siyang tagapangalaga ng kanilang seguridad, ngunit may dalang malaking pangarap.
Noong 2018, natanggap si Jun bilang iskolar ng “Regalo Mo, Kinabukasan Ko” (RMKK) program ng Security Bank Foundation, isang proyekto para sa mga anak at empleyado ng kanilang mga agency personnel. Habang patuloy sa pagbabantay bilang gwardiya, sabay niyang tinapos ang Bachelor of Science in Computer Science sa Dipolog City Institute of Technology.
Hindi madali ang kanyang pinagdaanan—pinagsabay niya ang trabaho, pamilya, at pag-aaral—ngunit dahil sa tiyaga, nagtapos siya With Honors noong Hulyo 2, 2022, sa edad na 32.
Matapos ang ilang buwang pagtatrabaho sa isang motorcycle company, dumating ang pagkakataong matagal niyang hinintay. Noong Marso 3, 2025, opisyal na siyang tinanggap bilang Bank Teller sa Security Bank Dipolog Branch—hindi na sa labas ng pinto, kundi sa loob ng bangko mismo.
Ang tagumpay ni Jun ay hindi lamang sariling kwento ng pagsisikap, kundi isang inspirasyon na nagpapakita na sa tulong ng edukasyon, disiplina, at mabuting oportunidad, posible talagang mabago ang takbo ng buhay.
Tags
Inspiring stories PH